Biyernes Santo

O hesus

Sa piling ng iyong mga apostol

Nakikiisa ako sa iyong pagdurusa

Gusto kong akuin ang mga haplit ng mga bala

                                    ang mga tinik na naidikdik sa iyong ginhawa

                                    ang mga suntok na naghasik ng pasa sa’yong kaluluwa

O hesus

Ito’y kalabisan sa iyong pagiging mesaya

Wag mo silang patatawarin

                alam ng mga hudyo ang kanilang ginagawa

alam ng mga saserdote ang kanilang ginagawa

                alam ng mga pariseo ang kanilang mga ginagawa

                alam ni Poncio Pilato ang kaniyang itinakda

Mahimbing ka o hesus

Iratay ang hapong katawan sa paanan ng asukarera

Ang Ama na ang bahalang magpasiya

    magparusa

At sa huling araw ng adbyento,

Lalamunin ng lupain ang haring dilawan

Sasalubingin kita kasabay ng paglaya ng tubuhan.

Alay sa pesanteng ibinayubay sa haliging tinik

At walang habas na pinagbabaril ng mga militar sa Hacienda Luisita.